Jawab-e-Shikwa ( Allama Muhammad Iqbal)

Jawab-e-Shikwa (PART 7) (Bang-e-Dra-120) 
                            Poet: Allama Muhammad Iqbal                                              

                                         Stanza (31)

Chashme-e-Aqwam Se Makhfi Hai Haqiqat Teri

 Hai Abhi Mehfil-e-Hasti Ko Zaroorat Teri

Zinda Rakhti Hai Zamane Ko Hararat Teri

 Koukab-e-Qismat-e-Imkan Hai Khilafat Teri

Waqt-e-Fursat Hai Kahan, Kaam Abhi Baqi Hai

 Noor-e-Touheed Ka Itmam Abhi Baqi Hai

                                 Stanza (32)

Misl-e-Bu Qaid Hai Ghunche Mein, Preshan Ho Ja

 Rakht Bar Dosh Hawaye Chamanistan Ho Ja

Hai Tunk Maya To Zarre Se Byaban Ho Ja

 Naghma-e-Mouj Se Hangama-e-Toofan Ho Ja!

Quwwat-e-Ishq Se Har Past Ko Bala Kar De

 Dehr Mein Ism-e-Muhammad (S.A.W.) Se Ujala Kar De

                                 Stanza (33)

Ho Na Ye Phool To Bulbul Ka Tarannum Bhi Na Ho

 Chaman-e-Dehr Mein Kaliyon Ka Tabassum Bhi Na Ho

Ye Na Saqi Ho To Phir Mai Bhi Na Ho, Khum Bhi Na Ho

 Bazm-e-Touheed Bhi Dunya Mein Na Ho, Tum Bhi Na Ho

Khema Aflak Ka Istada Issi Naam Se Hai

 Nabz-e-Hasti Tapish Aamadah Issi Naam Se Hai

                                 Stanza (34)

Dasht Mein, Daman-e-Kuhsar Mein, Maidan Mein Hai

 Behr Mein, Mouj Ki Aghosh Mein, Toofan Mein Hai

Cheen Ke Shehr, Maraqash Ke Byaban Mein Hai

 Aur Poshida Musalman Ke Iman Mein Hai

Chashm-e-Aqwam Ye Nazara Abad Tak Dekhe

 Riffat-e-Shan-e-‘Rafaana La Ka Zikrak’ Dekhe

                                 Stanza (35)

Mardam-e-Chashm-e-Zameen Yani Woh Kali Dunya

 Woh Tumhare Shuhada Palne Wali Dunya

Garmi-e-Mehr Ki Parwarda Hilali Dunya

 Ishq Wale Jise Kehte Hain Bilali Dunya

Tapish Andoz Hai Iss Naam Se Paare Ki Tarah

 Ghouta Zan Noor Mein Hai Aankh Ke Tare Ki Tarah

                                 Stanza (36)

Aqal Hai Teri Sipar, Ishq Hai Shamsheer Teri

 Mere Darvaish! Khilafat Hai Jahangeer Teri

Ma Siwa Allah Ke Liye Aag Hai Takbeer Teri

 Tu Musalman Ho To Taqdeer Hai Tadbeer Teri

Ki Muhammed (S.A.W.) Se Wafa Tu Ne Tau Hum Tere Hain

 Yeh Jahan Cheez Hai Kya, Loh-o-Qalam Tere Hain

Jawab-e-Shikwa ( Allama Muhammad Iqbal)

Jawab-e-Shikwa (PART 6)(Bang-e-Dra-120) 

                           Poet: Allama Muhammad Iqbal

                                 Stanza (26)

Dekh Kar Rang-e-Chaman Ho Na Pareshan Mali

 Koukab-e-Ghuncha Se Shakhain Hain Chamakne Wali

Khas-o-Khashaak Se Hota Hai Gulistan Khali

 Gul Bar Andaaz Hai Khoon-e-Shuhada Ki Laali

Rang Gardoon Ka Zara Dekh Tau Unnabi Hai

 Yeh Nikalte Huwe Suraj Ki Ufaq Taabi Hai

                                 Stanza (27)

Ummatain  Gulshan-e-Hasti Mein Samar Cheeda Bhi Hain

 Aur Mehroom-e-Samar Bhi Hain, Khazan Didah Bhi Hain

Saikron Nakhl Hain, Kaheeda Bhi, Baleeda Bhi Hain

 Saikron Batan-e-Chaman Mein Abhi Poshida Bhi Hain

Nakhl-e-Islam Namoona Hai Bru-Mandi Ka

 Phal Hai Ye Saikron Saalon Ki Chaman Bandi Ka

                                  Stanza (28)

Pak Hai Gard-e-Watan Se Sirr-e-Daman Tera

 Tu Woh Yousaf Hai Ke Har Misr Hai Kinaan Tera

Qafila Ho Na Sake Ga Kabhi Weeran Tera

 Ghair Yak Bang-e-Dara Kuch Nahin Saman Tera

Nakhl-e-Shama Asti-o-Dar Shaola Dawad Resha-e-Tu

 Aaqbat Soz Bawad Saya-e-Andesha-e-Tu

                                  Stanza (29)

Tu Na Mit Jaye Ga Iran Ke Mit Jane Se

 Nasha-e-Mai Ko Ta’aluq Nahin Pemane Se

Hai Ayan Yorish-e-Tataar Ke Afsane Se

 Pasban Mil Gaye Kaabe Ko Sanam Khane Se

Kashti-e-Haq Ka Zamane Mein Sahara Tu Hai

 Asr-e-Nau Raat Hai, Dhundla Sa Sitara Tu Hai

                                 Stanza (30)

Hai Jo Hangama Bipa Yorish-e-Balghari Ka

 Ghafilon Ke Liye Pegham Hai Baidari Ka

Tu Samajhta Hai Ye Saman Hai Dil Aazari Ka

 Imtihan Hai Tere Isaar Ka, Khud-Dari Ka

Kyun Harasan Hai Saheel-e-Faras-e-Aada Se

 Noor-e-Haq Bujh Na Sake Ga Nafs-e-Aada Se

Jawab-e-Shikwa ( Allama Muhammad Iqbal)

Jawab-e-Shikwa (PART 5)(Bang-e-Dra-120) 

                         Poet: Allama Muhammad Iqbal

                                 Stanza (21)

Tum Ho Apas Mein Ghazabnak, Woh Apas Mein Raheem

 Tum Khatakaar-o-Khatabeen, Woh Khata Posh-o-Kareem

                         Chahte Sub Hain Ke Hon Auj-e-Surayya Pe Muqeem,
                         Pehle Waisa Koi Paida Tau Kare Qalb-e-Salim!

Takht-e-Faghfoor Bhi Un Ka Tha, Sareer-e-Ke Bhi

 Yunhi Baatain Hain Ke Tum Mein Woh Hameeyyat Hai Bhi?

                                Stanza (22)

Khudkushi Shewa Tumhara, Woh Ghayoor-o-Khuddar

 Tum Akhuwat Se Gurezan, Woh Akhuwat Pe Nisar

Tum Ho Guftar Sarapa, Woh Sarapa Kirdar

 Tum Taraste Ho Kali Ko, Woh Gulistan Bah Kinar

Ab Talak Yaad Hai Qoumon Ko Hikayat Un Ki

 Naqsh Hai Safah-e-Hasti Pe Sadaqat Un Ki'

                                 Stanza (23)

Misl-e-Anjum Ufaq-e-Qoum Pe Roshan Bhi Huwe

 But-e-Hindi Ki Mohabbat Mein Barhman Bhi Huwe

Shauq-e-Parwaz Mein Mehjoor-e-Nasheman Bhi Huwe

 Be-Amal The Hi Jawan, Deen-e-Se Badzan Bhi Huwe

In Ko Tehzeeb Ne Har Bande Se Azad Kiya

 La Ke Kaabe Se Sanamkhane Mein Abad Kiya

                                 Stanza (24)

Qais Zehmat Kash-e-Tanhai-e-Sehra Na Rahe

 Shehr Ki Khaye Huwa, Bad Ye Pema Na Rahe!

Woh To Diwana Hai, Basti Mein Rahe Ya Na Rahe

 Ye Zaroori Hai Hijab-e-Rukh-e-Laila Na Rahe!

Gila-e-Jor Na Ho, Shikwa-e-Baidad Na Ho

 Ishq Azad Hai, Kyun Husn Bhi Azad Na Ho!

                                 Stanza (25)

Ehd-e-Nau Barq Hai, Aatish Zan-e-Har Khirman Hai

 Ayman Is Se Koi Sehra No Koi Gulshan Hai

Is Nayi Aag Ka Aqwam-e-Kuhan Indhan Hai

 Millat-e-Khatam-e-Rusal (S.A.W.) Shaola Ba Perahan Hai

Aaj Bhi Jo Baraheem (A.S.) Ka Imaan Paida

 Aag Kar Sakti Hai Andaz-e-Gulistan Paida

Jawab-e-Shikwa ( Allama Muhammad Iqbal)

Jawab-e-Shikwa (PART 4)(Bang-e-Dra-120) 

                           Poet: Allama Muhammad Iqbal

                                 Stanza (16)

Waaiz-e-Qoum Ki Woh Pukhta Khayali Na Rahi

 Barq Taba’ee Na Rahi, Shaola Maqali Na Rahi

                                         Reh Gyi Rasm-e-Azan, Rooh-e-Bilali Na Rahi
                                         Falsafa Reh Gya, Talqeen-e-Ghazali Na Rahi

Masjidain Marsiya Khawan Hain Ke Namazi Na Rahe

 Yani Woh Sahib-e-Ausaf-e-Hijazi Na Rahe

                                 Stanza (17)

Shor Hai Ho Gaye Dunya Se Musalman Nabood

 Hum Ye Kehte Hain Ke The Bhi Kahin Muslim Maujood!

Waza Mein Tum Ho Nisara, Tau Tamaddun Mein Hanood,

 Yeh Musalman Hain! Jinhain Dekh Ke Sharmaen Yahood?

Yun To Syed Bhi Ho, Mirza Bhi Ho, Afghan Bhi Ho

 Tum Sabhi Kuch Ho, Batao To Musalman Bhi Ho!

                                 Stanza (18)

Dam-e-Taqreer Thi Muslim Ki Sadaqat Bebak

 Adal Uss Ka Tha Qawi, Loos-e-Mara’at Se Pak

Shajar-e-Fitrat-e-Muslim Tha Haya Se Namnak

 Tha Shujaat Mein Woh Ek Hasti-e-Fouq-Ul-Idraak

Khud Gudazi Nam-e-Kaifiat-e-Sehbayesh Bood

 Khali Az Khawaish Shudan Soorat-e-Meenayesh Bood

                                Stanza (19)

Har Musalman Rag-e-Batil Ke Liye Nashtar Tha

 Uss Ke Aaeena-e-Hasti Mein Amal Jouhar Tha

Jo Bharosa Tha Usse Quwwat-e-Bazoo Par Tha

 Hai Tumhain Mout Ka Dar, Uss Ko Khuda Ka Dar Tha

Baap Ka Ilm Na Bete Ko Agar Azbar Ho

 Phir Pisar Qabil-e-Miraas-e-Pidar Kyunkar Ho!

                                 Stanza (20)

Har Koi Mast-e-Mai-e-Zauq-e-Tan Asani Hai,

 Tum Musalman Ho? Ye Andaaz-e-Musalmani Hai?

Haidari Faqr Hai Ne Doulat-e-Usmani Hai

 Tum Ko Aslaaf Se Kya Nisbat-e-Rohani Hai?

Woh Zamane Mein Mu’azzaz The Musalman Ho Kar

 Aur Tum Khawar Huwe Taarik-e-Quran Ho Kar

Jawab-e-Shikwa ( Allama Muhammad Iqbal)

Jawab-e-Shikwa (PART 3)(Bang-e-Dra-120) 

                            Poet: Allama Muhammad Iqbal

                                 Stanza (11)

Safah-e-Dehr Se Batil Ko Mitaya Kis Ne?

 Nau-e-Insan Ko Ghulami Se Chhuraya Kis Ne?

                                                Mere Kaabe Ko Jabeenon Se Basaya Kis Ne?

Mere Quran Ko Seenon Se Lagaya Kis Ne?

The Tou Aaba Woh Tumhare Hi, Magar Tum Kya Ho?

 Hath Par Hath Dhare Muntazir-e-Farda Ho!

                                Stanza (12)

Kya Kaha? "Bahr-e-Musalman Hai Faqt Wade-e-Hoor

 Shikwa Be-Ja Bhi Kare Koi Tau Lazim Hai Shaoor!

                                                Adal Hai Fatir-e-Hasti Ka Azal Se Dastoor

 Muslim Aaeen Huwa Kafir Tau Mile Hoor-o-Qasoor

Tum Mein Hooron Ka Koi Chahne Wala Hi Nahin

 Jalwa-e-Toor Tau Maujood Hai, Moosa Hi Nahin

                                 Stanza (13)

Manfa’at Aik Hai Is Qaum Ki, Nuqsan Bhi Aik

 Ek Hi Sab Ka Nabi (S.A.W), Din Bhi, Iman Bhi Aik

                                                Harm-e-Paak Bhi, Allah Bhi, Quran Bhi Aik,

                                                Kuch Bari Baat Thi Hote Jo Musalmaan Bhi Aik!

Firqa Bandi Hai Kahin, Aur Kahin Zaatain Hain

 Kya Zamane Mein Panapne Ki Yehi Baatain Hain?

                                Stanza (14)

Kon Hai Taarik-e-Aaeen-e-Rasool-e-Mukhtar (S.A.W.)?

 Maslihat Waqt Ki Hai Kis Ke Amal Ka Maayaar?

Kis Ki Ankhon Mein Samaya Hai Sha’ar-e-Aghyar

 Ho Gyi Kis Ki Nigah Tarz-e-Salaf Se Baizar?

Qalb Mein Souz Nahin, Rooh Mein Ehsas Nahin

 Kuch Bhi Paigham-e-Muhammad (S.A.W.) Ka Tumhain Paas Nahin

                                 Stanza (15)

Jaa Ke Hote Hain Masajid Mein Saf-Aara, Tau Ghareeb

 Zehmat-e-Roza Jo Karte Hain Gawara, Tau Ghareeb

Naam Leta Hai Agar Koi Hamara, Tau Ghareeb

 Pardah Rakhta Hai Agar Koi Tumhara, Tau Ghareeb

Umra Nasha-e-Doulat Mein Hain Ghafil Hum Se

 Zinda Hai Millat-e-Baiza Ghurba Ke Dam Se

Jawab-e-Shikwa ( Allama Muhammad Iqbal)

Jawab-e-Shikwa (PART 2)(Bang-e-Dra-120) 

                           Poet: Allama Muhammad Iqbal

                                  Stanza (6)

Hum Tau Mayal Ba-Karam Hain, Koi Sayal Hi Nahin

 Rah Dikhlaen Kise Rahraw-e-Manzil Hi Nahin

                                          Tarbiat Aam Tau Hai, Jauhar-e-Qabil Hi Nahin
                                          Jis Se Taamir Ho Aadam Ki Yeh Woh Gil Hi Nahin

Koi Qabil Ho Tau Hum Shan-e-Kai Dete Hain

 Dhoondne Walon Ko Dunya Bhi Nai Dete Hain!

                                Stanza (7)

Hath Be-Zor Hain, Ilhaad Se Dil Khoo-Gar Hain

 Ummati Baais-e-Ruswai-e-Paighamber (S.A.W) Hain

                                                But-Shikan Uth Gaye, Baqi Jo Rahe But-Gar Hain

Tha Braheem Pidar, Aur Pisar Aazar Hain

Badah Aasham Naye, Bada Naya, Khum Bhi Naye

 Harm-e-Kaaba Naya, But Bhi Naye, Tum Bhi Naye

                                Stanza (8)

Woh Bhi Din The Ke Yehi Maya-e-Raanai Tha

 Nazish-e-Mousam-e-Gul Lala-e-Sahrai Tha!

                                                Jo Musalmaan Tha Allah Ka Saudai Tha

                                                Kabhi Mehboob Tumhara Yehi Harjai Tha

Kisi Yakjai Se Ab Ehd-e-Ghulami Kar Lo

 Millat-e-Ahmad (S.A.W.) Ko Maqami Kar Lo!

                                Stanza (9)

Kis Qadar Tum Pe Garan Subah Ki Baidari Hai

 Hum Se Kab Pyar Hai! Haan Neend Tumhain Pyari Hai

                                                Tabaa-e-Azad Pe Qaid-e-Ramazan Bhari Hai

 Tumhi Keh Do, Yehi Aaeen-e-Wafadari Hai?

Qoum Mazhab Se Hai, Mazhab Jo Nahin, Tum Bhi Nahin

 Jazb-e-Baham Jo Nahin, Mehfil-e-Anjum Bhi Nahin

                                 Stanza (10)

Jin Ko Ata Nahin Dunya Mein Koi Fann, Tum Ho

 Nahin Jis Qoum Ko Parwaye Nasheman, Tum Ho

                                                Bijliyan Jis Mein Hon Aasudah, Woh Khirman Tum Ho

 Baich Khate Hain Jo Aslaaf Ke Madfan, Tum Ho

Ho Niko Naam Jo Qabaron Ki Tajarat Kar Ke

 Kya Na Baicho Ge Jo Mil Jaen Sanam Pathar Ke