Shikwaa (Allama Muhammad Iqbal)

Shikwaa  ( part 3)(Bang-e-Dra-105)

                            Poet: Allama Muhammad Iqbal

Ham Jo Jeete The Tho Jangon Ki Museebat Ke Liye

Aur Marte The Tere Naam Ki Azmath Ke Liye

Thi Na Kuch Taigh Zani Apni Hukoomat Ke Liye

Sarbakaf Phirte The KyaDeher Mein Daulat Ke Liye?

                         Qaum Apni Jo Zar-o-Maal-e-Jahaan Par Marti

                         Buth Faroshi Ke Iwaz Buth Shikani Kyun Karti?

  

Tal Na Sakte The Agar Jung Mein Ad Jaate The

Paaun Sheron Ke bhi Maindaan Se Ukhad Jaate The

Tujh Se Sarkash Huwa Koi Tho Bigad Jaate The

Taigh Kya Cheez Hai Hum Toup Se Ladh Jaate The

                         Naqsh Tauheed Ka Har Dil Pe Bithaaya Hum Ne

                         Zer-e-Khanjar Bhi Ye Paighaam Sunaaya Hum Ne

Tuhi Kehde Ke Ukhaada Dar-e-Khaibar Kisne?

Sheher Qaisar Ka Jo Tha Usko Kiya Sar Kisne?

Todey Makhlooq-e-Khudawand Ke Paikar Kisne?

Kaat Kar Rakh Diye Kuffaar Ke LAshkar Kisne?

                         Kisne Thanda Kiya Aatishkada-e-Iraan Ko?

                         Kisne Phir Zinda Kiya Tazkira-e-Yazdaan Ko?